Mang òr (29/11 - jăt jơ tàm tiah do dê), Củ tịc Quốk hội ồng Vương Đình Huệ bal mờ Mpồl kwang bàng kấp dờng Quốk hội lơgar he neh tus ƀlàng rơndeh par ling klàng Fairbain, càr lơgar Canberra sơn đờm còp mùl màl lơgar Australia jăt jơnau jà bơh Củ tịc Hạ viện lơgar Australia ồng Milton Dick, Củ tịc Thượng viện lơgar Australia mò Sue Lines.

Dơ̆ tus còp mùl màl lơgar Australia bơh Củ tịc Quốk hội ồng Vương Đình Huệ bal mờ Mpồl kwang bàng ala măt kấp dờng Quốk hội lơgar he dơ̆ do geh pơgồp bơnah lơh niam rơlao tai bơta git gơ̆p jŏ jòng đah bàr lơgar đơs bal, bơta git gơ̆p đah Kwang đơng lam kấp dờng đah bàr lơgar đơs is, lơh pràn rơlao tai bơta git gơ̆p, lơh broă bal đah anih lơh broă adăt boh lam bàr lơgar. Mờ dơ̆ tus còp do pơgồp bal bơnah tơnguh bơta git gơ̆p bal đah bàr lơgar tàm ală gah broă, tàm hơ̆ uă ngan là lơh sa, kă bro – bơcri priă, bơto bơtê – bơsram, sền gàr bơta lơngăp lơngai dà lơgar. Tàm dơ̆ tus còp do, Củ tịc Quốk hội ồng Vương Đình Huệ geh tus tìp, cri bơyai mờ kwang đơng lam kấp dờng lơgar Australia; tus bal pơrjum cri bơyai lơh broă bal, lơh sa, cri bơyai lơh broă bal bơto bơtê, còp mờ uă hìu bơsram đại họk, tìp măt, boh bơr mờ mpồl cau lơgar Việt Nam kis tàm lơgar Australia.