Dơ̆ lòt còp ngan ngồn lơgar Indonesia dơ̆ do bơh Củ tịc Quôk hội ồng Vương Đình Huệ dê rơ̆p pơgồp bơnah ai bơta gĭt gơ̆p Lơh broă bal kwơ màng đah lơgar Việt Nam mờ Indonesia ngai sơlơ mut lơh broă ngan ngồn mờ bơtàu tơnguh bơta gĭt gơ̆p đah 2 gah dê gơguh tus gơnoar broă pa tàm tơngai tus.

Kung tàm lơgar Indonesia, Củ tịc Quốk hội ồng Vương Đình Huệ lam bồ Mpồl kwang bàng kấp dờng Quốk hội lơgar Việt Nam tus bal Pơrjum dờng AIPA dơ̆ 44 nàng kờñ đơs nền gơnoar broă bơh Quốk hội Việt Nam dê, rcang lài, jơh nùs tă pơgồp ngan ngồn tàm tơngume bơh AIPA dê. Bal mờ ală Nghị viện tàm mpồl AIPA bơt bơtàu bơta tam klăc bal mờ gơnoar broă anih tờm bơh Asean dê, lơh pràn bơta gĭt gơ̆p đah AIPA mờ ală lơgar lơh broă bal, pơgồp bơnah tàm broă lơh bơt bơtàu mpồl Asean; lơh jăt niam kơnòl broă, jơnau đơs bơh AIPA dê gơwèt mờ ring lơngai, kơ̆ kơl jăp mờ bơtàu tơnguh.