Wă Củ tịc Quốk hội ồng Vương Đình Huệ mờ Mpồl kwang bàng ala măt dờng màng Quốk hội lơgar Việt Nam tàm ƀlàng rơndeh par geh Đại sứ lơgar Việt Nam tàm lơgar Indonesia bal mờ ala măt cau lơgar Việt Nam kis tàm càr lơgar Jakarta. Tơnơ̆ mờ dơ̆ wă, Củ tịc Quốk hội ồng Vương Đình Huệ neh cri bơyai mờ Củ tịc Hạ viện lơgar Indonesia mò Poan Maharani.

Củ tịc Hạ viện lơgar Indonesia đơs niam mờ bơta kwơ màng bơh dơ̆ tus còp mùl màl lơgar Indonesia dơ̆ sơnrờp bơh Củ tịc Quốk hội ồng Vương Đình Huệ dê mờ kung là dơ̆ tus còp lơgar Indonesia sơnrờp ngan bơh Củ tịc Quốk hội lơgar Việt Nam dê tơnơ̆ mờ 13 nam. Bàr nă kwang đơng lam ring bal bè ală gùng dà broă lơh dờng nàng pơn jăt tai lơh pràn bơta git gơ̆p bal đah bàr lơgar tàm tơngai tus, pơn jăt tai lơh pràn broă tam gơl mpồl kwang bàng, tìp bal kấp dờng mờ ală kấp tàm ală gah Đảng, Dà lơgar, lơh broă bal Nghị viện, git gơ̆p lơh broă bal đah ală tiah mờ tìp bal làng bol, mùl màl tơnkah 10 nam bơta git gơ̆p Lơh broă bal Jŏ jòng mờ wèt tus tơnkah 70 nam bơta git gơ̆p lơh broă bal mờ lơgar bơdìh tàm nam 2025.