VOV4.K’ho - Tàm hìu lơh broă Quốk hội lơgar Anh, Củ tịc Quốk hội ồng Vương Đình Huệ neh cri bơyai mờ Củ tịc Thượng viện lơgar Anh ồng John Mcfall.

                   Củ tịc Quốk hội ồng Vương Đình Huệ cri bơyai mờ Củ tịc Thượng viện lơgar Anh

Tàm dơ̆ cri bơyai, bàr kwang đơng lam chờ hờp tŭ gŏ, lơgar Việt Nam mờ lơgar Anh neh lơh broă bal nền nòn tàm mpồl uă lơgar bè Liên hợp quốk, Pơrjum lơh sa bal câu Á – câu Âu (ASEM) mờ broă lơh bal đah mpồl ASEAN mờ lơgar Anh, lơgar Việt Nam sùm kờñ bal broă lơgar Anh chồl pràn broă lơh bal mờ mpồl ASEAN mờ lơgar Anh kờñ bal gơnoar tờm bơh mpồl ASEAN mờ là tiah tơrbŏ bal kwơ màng đah lơgar Việt Nam mờ mpồl tam klăc câu Âu (EU).

Bàr gah ring bal pơn jăt tai tơnguh broă tam gơl mpồl kwang đơng lam, ală anih lơh broă Quốk hội, Mpồl Nghị sĩ git gơ̆p, lơh bơyô bal mờ ală nghị sĩ; cri bơyai broă mờng chài lơh broă nghị viện bơh tơl lơgar dê; tơnguh broă pơgồp bal sền gròi mờ lam sồr lơh jăt ală jơnau ring bal lơh broă bal mờ Cíñ phủ bàr lơgar neh kĭ hơ bal, ală rơndăp broă lơh broă bal jŏ jòng; kờñ bal Cíñ phủ, ală tiah, mpồl lơh sa kă bro mờ làng bol bàr lơgar tơnguh broă tìp bal, chồl pràn broă git wă bal mờ lơh broă geh kwơ bal.

Cau mblàng Ndong Brawl