Tơnơ̆ dơ̆ wă rò tơn, Củ tịc Quốk hội ồng Vương Đình Huệ neh cribơyai mờ Củ tịc Thượng viện lơgar Nhờk. Tàm dơ̆ cribơyai, 2 nă kwang đơng lam bồ đơs là, bơh tŭ lơh geh bơta gĭt gơ̆p “Lơh broă bal jŏ jòng jrô ơnàng làm uă tài ring lơngai mờ bơtàu tơnguh sùm tàm câu Á”, lơh broă bal đah 2 lơgar gam bơtàu tơnguh niam bơnĕ mờ bơta pin dờn cíñ trị uă ngan, hơ̆ là bơnàng jă nàng lơh broă bal tơl làm mờ jrô ơnàng làm uă lơh geh uă cồng nha tàm jơh ală gah.

Nàng tơnguh rlau tai bơta gĭt gơ̆p lơh broă bal đah 2 Anih lơh broă crơng gơs adat boh lam, Củ tịc Quốk hội ồng Vương Đình Huệ sồr, 2 gah sơlơ tơnguh lơh broă bal, cribơyai, tam pà bal bơta mờng chài lơh broă đah ală Ủy ƀan ờs lơh broă; lơh jăt niam gơnoar broă kwơ màng, pơgồp bal tàm broă lơh sir gùng dà broă lơh, broă lơh bơt bơtàu adat boh lam dong kờl mpồl lơh sa kă bro đah 2 lơgar dê rề ơnàng lơh broă bal, bơcri priă tàm tơl lơgar.