VOV4.K’ho- Lam lơh broă lơh bơh Đảng đoàn Quôk hội dê nam 2022, mho ngai 29/3 tàm hìu lơh broă Quôk hội, Ƀí thư Đảng đoàn Quôk hội, Củ tịc Quôk hội ồng Vương Đình Huệ neh đơng lam dơ̆ lơh broă bơh Đảng đoàn Quôk hội mờ Ƀan Thường vụ Tỉñ ủy Khánh Hòa. Tàm dơ̆ lơh broă, Đảng đoàn Quôk hội neh iat Ƀan Thường vụ Tỉñ ủy Khánh Hòa yal bè broă lam lơh jat Nghị quyết sồ 9 ngai 28/01 bơh Ƀộ Cíñ trị dê bè bơt bơtàu, bơtàu tơnguh càr Khánh Hòa tus nam 2030, broă wèt sền tus nam 2045 mờ broă lam lơh jat ală Nghị quyết bơh Quôk hội dê bè lơh sa- mpồl bơtiàn tàm càr Khánh Hòa.

Nghị quyết bơh Ƀộ Cíñ trị dê ai tơlik 10 kơnòl, broă lơh tờm ngan nàng bơt bơtàu càr Khánh Hòa tus nam 2030 mờ ƀòn dờng gơ wèt dà lơgar bơh bơta tơnguh uă bơta pràn, bơta ƀuơn bè dà lềng, là tiah drà ngac ngar, kơ̆ kơljap, cèng bơta niam chài mờ tàm tơrbŏ bal dunia; là dùl gah bơh gơguh lơh sa dê, là tiah tờm bơh tiah kềng gah dà lềng mờ tiah đah jum tàm gùl lơgar, Tây Nguyên mờ gùt lơgar dê bè lơh sa dà lềng. Tàm dơ̆ lơh broă, ală kwang bàng neh đơs, tă pơgồp ală broă lơh nàng chồl pràn bơta bơtàu tơnguh bơh càr Khánh Hoà dê, ngan là broă bơt bơtàu ală kơ cế, broă lơh krơi is nàng lam lơh ală kơnòl broă, broă lơh bơt bơtàu, bơtàu tơnguh càr Khánh Hòa tus nam 2030, broă wèt sền tus nam 2045.

Cau mblàng K’Duẩn