Tàm dơ̆ pơrjum do, Củ tịc Quốk hội ồng Vương Đình Huệ sồr, jơnau yal jăt sền pal mblàng loh làng bơta niam, bơta ờ niam tŭ lơh lơh jăt 3 Broă lơh, mờ ală jơnau đơs, broă lơh tàm rơndăp broă cih jơnau yal pal di pal, di mờ mùl màl.

Bè đah bơh Ƀộ Nông nghiệp mờ Phát triển Nông thôn, Củ tịc Quốk hội ồng Vương Đình Huệ tơnkah pal hơ ală jơnau gơlik geh mờ làng bol geh sền gròi bè: broă giă phe tăc mờ lơgar bơdìh; pal sền swì nền broă gơrềng bơh broă lơh tơrlòng kơrnoăt jào ală càr, ƀòn dờng in geh lơh nền broă tam gơl bă ù lơh kòi hờ đơm 20 lồ, broă gơrềng bal tus mờ broă lơh, sền gàr bơta kwơ phan tàm dà, broă bơsong “sră rơmit” bơh Ủy ƀan câu Âu (EC) gơwèt mờ phan tàm dà... Do là ală broă kal ke mờ gah lơh sa suơn sre gam pal bơsong nàng gơtùi dờp mờ ală bơta lòng pa.