VOV4.K’ho - Drim òr (20/10), tàm hìu Quốk hội geh bơyai lơh sơn đờm pơrjum dơ̆ 4, Quốk hội khoă 15 tềng đăp mờ broă đơng lam bơh Củ tịc Quốk hội ồng Vương Đình Huệ.

Củ tịc Quốk hội ồng Vương Đình Huệ geh jơnau đơs tàm dơ̆ sơn đờm pơrjum

Ală kwang bàng tus pơrjum dơ̆ 4, Quốk hội khoă 15

Kờp dŭ tàm 21 ngai lơh broă, Quốk hội geh sền wơl, pơgồp jơnau đơs mờ tơlik kơrnoăt uă tơngu me kwơ màng gơrềng tus mờ lơh sa mpồl bơtiàn mờ kes priă dà lơgar; sền wơl, ring bal 07 rơndăp broă cih adăt boh lam, 03 rơndăp broă nghị quyết geh ơn kơrnoăt adăt boh lam; cri bơyai, pơgồp jơnau đơs 07 rơndăp broă cih adăt boh lam. Đơs tàm dơ̆ sơn đờm, Củ tịc Quốk hội ồng Vương Đình Huệ đơs tờm, tềng đăp mờ broă đơng lam di pal, song dơ pă, di tŭ bơh Đảng mờ Dà lơgar; ai geh broă lơh di pal, rơcang mờ jăt sền geh cồng nha bơh Quốk hội; broă đơng lam, lam lơh nền nòn, pràn kơl dang bơh Cíñ phủ, Thủ tướng Cíñ phủ; broă tam klăc bal, pơgồp bal nền nòn bơh ală kấp, ală gah lơh broă. Bơta tàm lơgar 9 nhai nam 2022 neh geh ală cồng nha niam, geh uă bơta tơngŏ geh pơnrơ. Gơguh GDP 9 nhai geh 8,83% uă ngan bơh nam 2011 tus tŭ do; ală tiah lơh sa ndrờm geh khà brồ guh wơl mờ gơguh uă.

VOV.vn/Ndong Brawl mblàng