VOV4.K’ho- Bơh bơta đơng lam bơh Củ tịc Quôk hội ồng Vương Đình Huệ, drim ngai 7/09, Pơrjum kwang bàng Quôk hội lơh kơnòl broă sùm neh sơnđờm mŭt pơrjum nàng kờñ cribơyai, ai jơnau đơs tàm 06 rơndap broă lơh adat, 01 jơnau rcang cih Nghị quyết yal mờ Quôk hội in ring bal tàm Pơrjum dơ̆ 4 tus.

Anih tàm dơ̆ pơrjum

Đơs tàm dơ̆ sơnđờm mŭt pơrjum, Củ tịc Quôk hội ồng Vương Đình Huệ pà gĭt, bơh sơnđờm tơngai lơh broă tus tŭ do, Quôk hội khoá 15 neh bơyai lơh geh cồng nha 04 dơ̆ pơrjum, ai lơh jat 8 adat, ai jơnau đơs 07 rơndap broă lơh adat ndai, ai lơh jat 62 Nghị quyết mờ bơta ring bal, dùl nùs bal uă.

Củ tịc Quôk hội ồng Vương Đình Huệ đơng lam pơrjum Kwang bàng Quôk hội lơh kơnòl broă sùm

Pơrjum dơ̆ 4 mờr tus bơh Quôk hội dê geh uă kơnòl broă lơh adat boh lam kwơ màng. Ală rơndap broă lơh, jơnau rcang cih kờp dŭ yal mờ Quôk hội in ring bal neh geh Ủy ƀan Thường vụ Quôk hội, Cíñ phủ đơng lam bơyai lơh cribơyai, ai jơnau đơs tă pơgồp bơh uă dar, tàm uă dơ̆ pơrjum, pơrjum cribơyai lùp lăp, Ủy ƀan Thường vụ Quôk hội kung neh ai jơnau đơs nền nòn bè ală broă dờng gam geh jơnau đơs krơi is tàm dơ̆ pơrjum tơngume bơt bơtàu adat boh lam sơn rờp bơh Ủy ƀan Thường vụ Quôk hội dê.

 Cau mblàng K’Hạnh