Jat rơndap broă lơh, Cribơyai Lơh sa- Mpồl bơtiàn lơgar Việt Nam nam 2023, geh tơngume “Bơsong priă jền, bơceh lơh bơta gơn kơnờm pa ai gơguh lơh sa mờ bơtàu tơnguh kơ̆ kơl jap”. Củ tịc Quôk hội ồng Vương Đình Huệ đơs là, Cribơyai pal lơh loh ală bơta tàm dunia, broă lơh tàm ntrờn ù tiah- lơh sa mờ bơta lòng pa gơwèt mờ broă lơh bơtàu tơnguh wơl, bơtàu tơnguh lơh sa mờ gơrềng tus lơgar Việt Nam, Cribơyai pal sền sơ wì tơl làm, di pal mờ bơta rài lơh sa bơh Dà lơgar dê tàm 6 nhai bồ nam 2023.

Gơrềng tus mìng dùl tơngume “Tă bơsong bơta kòl yan, bơsong priă jền, dong kờl rài lơh sa halà mpồl lơh sa kă bro sơr lèt gan kal ke”, tàm pơrjum, ală kwang bàng sơñio loh bơta kwơ là tơngai pa do lơh sa dờng kơ̆ kơl jap mờ pal sơr lèt gan bơta kòl yan, bơta lòng nàng “ai wơl” bơta pràn gơguh lơh sa, lơh geh bơnàng jă tàm tơngai tus. Ală kwang bàng kung dùl nùs bal mờ mìng dùl tơngume “Gàr niam broă lơh, gàr niam rài kis mpồl bơtiàn, pơgồp bơnah lơh geh bơta gơn kơnờm sơlơ gơguh lơh sa mờ bơtàu tơnguh kơ̆ kơl jap” mờ sồr tơnguh uă bơta gĭt wă cau lơh broă in, lơh sir broă lơh Bảo hiểm xã hội, kơ̆ kơljap broă lơh, wèt tus gơguh lơh sa tơlir, bơtàu tơnguh kơ̆ kơljap.