Củ tịc Quốk hội ồng Vương Đình Huệ đơs sùm, tài kơnờm bơh ală broă dong kờl, broă lơh di pal, di tŭ, ờ hềt tŭ lơi geh lài tàm tơngai do, sền tơrgùm bal nggùl tơngai lơh broă do, lơgar Việt Nam neh kơl dang sơrlèt mờ kal ke, bơta lòng tềng đăp “ală dơ̆ càl dră wơl” mờ lơh geh uă cồng nha kwơ màng, mờr tơl ală bơta.

Jăt Củ tịc Quốk hội đơs, bơh ală dơ̆ tung lơtang, ală kal ke, gơkòl, ngai sơlơ git loh làng rơlao bơta kwơ màng mờ gơnoar tờm bơh bơta pràn tàm dơlam is, nùs nhơm pràn is, rơcang lài tàm broă bơtàu tơnguh lơh sa. Tơnguh bơta pràn geh is, lơh geh bơta gơn kơnờm ai gơguh lơh sa in là jơnau sồr ờ gơtùi gĭt lài, ờ gơtùi pleh klàs mờ geh kwơ  ngan nàng gàr niam bơta geh sùm, kơl jăp, jŏ jòng, dong kờl dà lơgar ngui tŭ niam, sơrlèt bơta lòng, lơh geh bơta pràn, kong jai tềng đăp mờ ală bơta ờ niam gơbàn nisơna, tung lơtang bơh bơdìh, mờ dong kờl rài lơh sa gơguh, wèt tus broă bơtàu tơnguh kơl jăp.