Đơs tàm dơ̆ pơrjum, Củ tịc Quôk hội ồng Vương Đình Huệ tơngkah, Hội đồng Ñân zân càr Quảng Trị pal pơn jat tai kơlôi sơnơng jrô mờ lam lơh jat ngan ngồn, lam lơh jat dùl bă gơ in niam ngan ală Nghị quyết bơh Đảng, ală Nghị quyết bơh dà lơgar, Nghị quyết pơrjum dơ̆ 5 Quôk hội khoă XV dê pa geh ring bal nàng lơh mùl màl gơs Nghị quyết bơh Hội đồng Ñân zân càr tàm tơl gah broă. Pơn jat tai tam gơl pa pràn kơldang, tơnguh bơta niam, cồng nha lơh broă bơh Hội đồng Ñân zân dê tàm broă lơh nền ală broă kuơmàng bơh càr, ƀòn dờng dê.

Tơrgùm tă bơsong ală bơta kòl yan, kal ke neh geh đơs loh, pơn jat tai lơh sir kơrnuat boh lam nàng bơt bơtàu, bơtàu tơnguh càr Quảng Trị, tơnguh mhar tơngai lam lơh ală rơndap broă bơcri priă dà lơgar, rơndap tap sèng phan bơna, lơh sa mpồl bơtiàn, ngan là ală rơndap broă dờng, kuơmàng bơh càr dê; ală broă lơh jơnau kờñ dà lơgar, broă lơh bơtàu tơnguh wơl mờ bơtàu tơnguh lơh sa.