Tàm dơ̆ lơh broă, ala măt ală Ủy ƀan bơh Quốk hội, ală ƀộ, gah lơh broă gơrềng bal đơs niam cồng nha ƀòn dờng Hà Nội neh lơh geh tàm tơngai do. Tơnơ̆ 15 nam rề ơnàng ù tiah, muh măt ƀòn dờng geh uă tam gơl niam. Hà Nội neh geh ală cồng nha pal geh dờp ngan, GRDP gơguh uă; tă dia dà lơgar bơh ƀòn dờng Hà Nội dê sơrlèt mờ kờp dŭ lài.

Đơs pơn dŭt dơ̆ lơh broă, Củ tịc Quốk hội ồng Vương Đình Huệ đơs là, ƀòn dờng Hà Nội neh lơh ngan lơh jăt niam ală Nghị quyết bơh Pơrjum dờng Đảng, Nghị quyết bơh ƀòn dờng, ală Nghị quyết bơh Dà lơgar, Quốk hội, Cíñ phủ dê mờ lơh geh cồng nha tơl ală bơta kwơ màng. Tàm tơngai tus, Củ tịc Quốk hội sồr ƀòn dờng Hà Nội pơn jăt tai sền wơl ală kơnòl broă nggùl tơngai lơh broă nàng geh bơta bơtàu tơnguh mhar, pràn rơlao, sền wơl bơta tơl pràn lơh gơs ală jơnau kờñ bơtàu tơnguh lơh sa mpồl bơtiàn tàm gùt tơngai lơh broă; lơh niam rơlao tai broă bơcri priă dà lơgar, jơh nùs lam lơh jăt ală rơndăp ù tiah neh lơh geh; lơh loh tài bơta lơi lơh bơta pràn tơrgùm bal bơh ƀòn dờng gơmù pơn drờm mờ bơta geh bal bơh gùt lơgar dê.