VOV4.K’ho- Pơn jat tai dơ̆ lơh broă tàm ală càr tiah đah Jum tàm gùl dà lơgar, drim ngai 27/07, Củ tịc Quôk hội ồng Vương Đình Huệ mờ mpồl lơh broă neh lơh broă mờ Ƀan Thường vụ Tỉñ ủy càr Quảng Nam.

Củ tịc Quôk hội ồng Vương Đình Huệ lơh broă mờ Ƀan thường vụ Tỉñ ủy Quảng Nam

Củ tịc Quôk hội ồng Vương Đình Huệ đơs, bơh dùl càr mìng lơh sa suơn sre lơm, Quảng Nam neh brồ guh gơ gơs là dùl càr gơguh kờp bal pràn đau tàm tiah do, rài lơh sa ngai sơ lơ pờ ơnàng, là 1 tàm 16 càr, ƀòn dờng geh tam pà bè kes priă dà lơgar mờ là càr mìng dùl lơm jơh gùt lơgar dê geh bal tiah lơh sa pờ, tiah lơh sa jat kềng gah dà lềng mờ tiah lơh sa mpồng tiah nhàr lơgar. Broă lơh ờdo ờdă rài kis mpồl bơtiàn, broă dong kờl mpồl bơtiàn geh sùm, ngan là tŭ ală cau cíñ sác, cau geh màng mờ dà lơgar geh tus  rlau 23% khà kờp làng bol gùt càr dê. Tàm tơngai tus, Củ tịc Quôk hội ồng Vương Đình Huệ sồr, càr pơn jat tai kờp sền ală broă lơh lơh broă lam lơh jat ală Nghị quyết tơngume bơh dà lơgar, bơh càr dê; geh gùng dà broă lơh nền cê nàng lơh jat; lơh broă lam lài tàm broă bơtàu tơnguh nhơl chờ, bơtàu tơnguh wơl tơnơ̆ kòp dờng, tiah ơm kis, drơng broă ala, phan bơna nhơl chờ pal geh bơta bơtàu tơnguh mhar mờ pràn kơl dang; lơh pràn 3 broă lơh jơnau kờñ dà lơgar dê.

Cau mblàng K’Hạnh