Củ tịc Quốk hội sồr, Ƀộ Văn hoá, Thể thao mờ Zu lịc pal lơh jăt jơnau đơng lam bơh Tổng Ƀí thư tàm pơrjum lơh jăt bơta niam chài gùt lơgar, kờñ tơmù bơta lơyài broă lơh jăt kơrnoăt pal jăt gùng dà broă lơh, nùs nhơm kơlôi sơnơng, gùng dà broă lơh bơh Đảng, lơh gơs adăt boh lam mờ ală broă lơh mùl màl, geh cồng nha bè broă tơnguh bơtàu bơta niam chài, bơ̆t bơtàu kòn bơnus.

Adăt boh lam lơgar Việt Nam pal di pal mờ bơta krơi is bơh broă lơh niam chài đơs crih tamya, tơnguh uă ngan ală bơta pràn bơh Dà lơgar bal mờ mpồl bơtiàn, bơh tàm lơgar bal mờ lơgar bơdìh nàng tơnguh bơtàu bơta niam chài. Củ tịc Quốk hội lam sồr, Ƀộ Văn hoá, Thể thao mờ Zu lịc rơcang pơlam, pơgồp jơnau đơs tus mờ Cíñ phủ, Quốk hội ală broă jal mhar, krơi is geh jơnau pal jăt, broă lơh is nàng dong kờl, bơsong kal ke, tơnguh bơtàu tơl ală bơta, ndrờm bal ală gah broă niam chài, geh tơnguh ală bơta kwơ niam bơnĕ jơi bơtiàn dê, mờ tơrgùm geh ală bơta niam chài kòn bơnus dê. Pơn jăt tai đơng lam, bơyai lơh jăt niam ală rơndăp broă lơh bè bơta niam chài, tàp pràn să jan, nhơl chờ gơwèt ală broă lơh jăt jơnau kờñ dà lơgar neh geh ai, tàm hơ̆ geh ƀòn lơgar pa, tơmù rơƀah kơl jăp.