Mho òr (14/05), Củ tịc Quốk hội ồng Vương Đình Huệ lơh broă mờ Ƀan Thường vụ Tỉñ ủy Hà Nam bè broă lơh jăt Nghị quyết Pơrjum dờng dơ̆ 13 Đảng, Nghị quyết sồ 20 bơh pơrjum dờng Đảng ƀộ càr dê bal mờ cồng nha lơh jăt kơnòl tơnguh bơtàu lơh sa mpồl bơtiàn, tă kes priă dà lơgar tàm 4 nhai bồ nam do.

Đơs tàm dơ̆ lơh broă, Củ tịc Quốk hội ồng Vương Đình Huệ ring bal mờ gùng dà broă lơh, ală jơnau kờñ, kơnòl broă mờ broă lơh tờm Đảng ƀộ càr Hà Nam neh ai tàm ală nhai lồi nam 2023 mờ nggùl tơngai lơh broă gam tai, Củ tịc Quốk hội ồng Vương Đình Huệ geh jơnau pơlam sồr càr Hà Nam pơn jăt tai lơh niam broă bơ̆t bơtàu Đảng, bơ̆t bơtàu mpồl cíñ trị, pơn jăt tai tơnguh bơhiàn kah yau, kăc màng, tam klăc bal, lơh tờm, di jăt adăt boh lam, lơh pràn broă tam gơl pa bơh ceh pa, lơh ngan uă rơlao tai nàng lơh geh cồng nha ală kơnòl geh jào. Bè bơ̆t bơtàu ƀòn lơgar pa tàm tơngai tus. Càr Hà Nam pal lơh pràn jăt broă lơh sa suơn sre kloh niam, ƀòn lơgar pa mờ làng bol lơh broă sa gơguh jăk.