Ngai 17/07, Củ tịc Quôk hội ồng Vương Đình Huệ bal mờ mpồl lơh broă neh lơh broă mờ Mpồl Lơh kơnòl broă sùm Tỉñ ủy càr Quảng Trị. Tơnơ̆ 34 nam crơng gơs wơl càr, Quảng Trị gam rơhời tam gơl pa mờ bơtàu tơnguh. Quảng Trị gam ngai sơlơ brồ guh, broă lơh sa ngai sơlơ rề ơnàng, tă pơgồp tàm bơta bơtàu tơnguh bal bơh dà lơgar dê. Khà gơguh Kờp jơh phan bơna lơh geh tàm ù tiah càr dê hòi lơyah là GRDP kờp bal tơngai bơh nam 2021- 2022 geh 6,9%/dùl nam, 06 nhai bồ nam 2023 gơguh 6,25%. Tă dia Dà lơgar dê nam 2021 geh 160% kờp dŭ lài mờ nam 2022 geh 113% kờp dŭ lài. Broă lam lơh jăt Kơrnoăt sồ 43 bơh Quôk hội dê bè gùng dà broă lơh dong kờl dia mờ bơcri priă dà lơgar mờ gùng dà broă lơh dong kờl priă jền tơm dong kờl Broă lơh bơtàu tơnguh wơl mờ bơtàu tơnguh lơh sa- mpồl bơtiàn mờ Kơrnoăt sồ 11 bơh Cíñ phủ dê bè Broă lơh bơtàu tơnguh wơl mờ bơtàu tơnguh lơh sa- mpồl bơtiàn geh lam lơh jơh nùs ngan.

Đơs pơndŭt tàm dơ̆ lơh broă, Củ tịc Quôk hội ồng Vương Đình Huệ sồr Đảng ƀộ càr pal mhar lơh sir sră nggal rơndăp ù tiah càr Quảng Trị tơngai bơh nam 2021- 2030, nàng jòi mờ lơh jăt uă ngan rlau jơh bơta tơl pràn, bơta ƀươn bơh càr dê; đơs sùm tus jơnau lơh geh cồng nha “kơ̆p kờñ ngan ring lơngai” tàm Quảng Trị, Củ tịc Quôk hội đơs là, là kơnhoàl ù tiah àñ ơnòng kong uă ngan gar phàu ƀồm mền gar năt cui rơcai ngan rlau jơh tàm jơh 2 dơ̆ tam lơh dờng jŏ jòng ngan bơh jơi bơtiàn dê, Quảng Trị là tiah dipal ngan nàng đơs tus “kơ̆p kờñ ngan ring lơngai”.