Đơs pơn dut tàm dơ̆ lơh broă, Củ tịc Quôk hội ồng Vương Đình Huệ đơs nền, jơnau rơcang cih Adat Ù tiah (tam gơl) ngai 01/8 neh geh tam gơl jat bơta tơrgùm wil tơl mờ cih dờp jơh nùs, sac rơ wah jơnau đơs bơh ală kwang bàng Quôk hội dê tàm dơ̆ pơrjum dơ̆ 5 pa do, jơnau đơs bơh ală anih lơh broă bơh Quôk hội, ală anih lơh broă mờ mpồl lơh broă geh gơ rềng, làng bol dê. Củ tịc Quôk hội kung đơs niam, anih lơh broă đơng lam cih gơs mờ Cíñ phủ neh jơh nùs ngan pơgồp bal mờ Ủy ƀan Lơh sa mờ ală anih lơh broă Quôk hội dê neh tam gơl dùl bơnah tai dùl bă wil tơl ngan. Tus tŭ do, bơta niam ală rơndap lơh adat boh lam niam mờ gam lòt di gùng di dà.

Củ tịc Quôk hội sồr Jơnau rơcang cih Adat Ù tiah (tam gơl) pal gàr niam bơta ndrờm bal mờ ală adat ndai tàm ală kơrnuat boh lam, ngan là gơ wèt mờ ală rơndap lơh adat boh lam mờ Quôk hội gam sền sơ wì, lơh nền; bañ ngui adat do lơh ala gơnăp gơnoar bơh adat ndai dê.