Dơ̆ tus còp mùl màl lơgar Australia bơh Củ tịc Quốk hội ồng Vương Đình Huệ geh lơh pràn bơta git gơ̆p đah bàr Quốk hội/Nghị viện bàr lơgar mờ geh ală broă tơnguh bơtàu pa, pờ geh bơta niam, ai geh bơta pràn pa ai broă lơh, lơh broă bal ngai sơlơ mùl màl, geh cồng nha đah bàr lơgar tàm jơh ală gah broă, cèng wơl geh bơta kwơ mùl màl ai làng bol bàr lơgar in.

Tơngai do, bơta git gơ̆p đah bàr lơgar neh tơnguh bơtàu niam bơnĕ ngan, tàm hơ̆ uă ngan là bơh tŭ bàr lơgar crơng gơs broă lơh, lơh broă bal jŏ jòng tàm nam 2017. Broă git gơ̆p cíñ trị ngai sơlơ đềt mềr, pin dờn bơh broă tam gơl mpồl kwang bàng mờ tìp bal tàm jơh ală kấp mờ ală gah broă bè: Đảng, Quốk hội mờ Cíñ phủ, tìp bal làng bol. Lơh broă bal tàm ală gah lơh sa, kă bro, bơcri priă geh broă tơnguh bơtàu niam. Priă geh bơh broă kă bro bàr đah gơguh uă bŭ lah gơtìp gơrềng tài bơh kòp gơtờp: nam 2021 geh 12 tơmàn 400 tơlăk dolar Mỹ, gơguh mờr 50% pơn drờm mờ nam 2020; lơgar Australia sùm ai lơgar Việt Nam in khà priă ODA kơl jăp. Pa do, lơgar Australia yal kes priă nam priă jền 2022-2023, jăt mờ hơ̆, lơgar Australia pà priă ODA ai lơgar Việt Nam in geh 92 tơlăk 800 rơbô dolar priă lơgar Australia dê.