VOV4.K’ho- Tàm dơ̆ gờm chờ jai pha bơh mpồl coh plai cau ùr Việt Nam dê geh lơh tàm drim ngai 11/02, Củ tịc Quôk hội ồng Vương Đình Huệ neh pơyua pà phan sa tềp ai cau pơlam tàp ồng Mai Đức Chung mờ nting bơr gờm chờ cồng nha bơh mpồl coh plai cau ùr Việt Nam dê. Ală ngai do, ală kwang đơng lam bồ dờng màng ngan rlau jơh bơh Đảng, dà lơgar, Quôk hội dê neh sền gròi ngan, chờ hờp tềng đap cồng nha jak ngan bơh mpồl coh plai cau ùr Việt Nam dê.

Mờ bơta lơh ngan pràn ngan mờ nùs nhơm pơn đơl uă ngan, cau pơlam tàp ồng Mai Đức Chung bal mờ ală cau coh plai tàm mpồl neh sơrlèt gan uă ngan kal ke nàng dơ̆ sơn rờp tàm rài kah yau ai gơnoar mut tàm dơ̆ pơrlòng coh plai cau ùr dunia nam 2023. Jai pha bơh mpồl coh plai cau klau dê tàm ngai 1 sa tềp mờ pơn jat hơ̆ là jai pha bơh mpồl coh plai cau ùr dê tàm dar dut ndơl Asian Cup cau ùr nam 2022 neh lơh gơ rềng bơta pràn niam ngan tus cau kờñ môn coh plai lơgar Việt Nam.

Cau mblàng K’Duẩn