Tàm dơ̆ pơrjum cribơyai, Củ tịc Quôk hội ồng Vương Đình Huệ chờ hờp bal mờ lơgar Bangladesh bè ală cồng nha lơh geh pa do; kwơmàng là GDP gơguh rlau 7% tàm nam priă jền 2021- 2022, lơgar Bangladesh neh gơ gơs là lơgar tăc phan mờ lơgar ndai uă dơ̆ 2 tàm dunia bè ală phan mai soh mờ là lơgar lơh krơh lam lài tàm broă lơh ală hìu măy tơlir hơ̆ là hìu măy ờ lơh ƀơ̆ ƀơl tiah ơm kis.

Củ tịc Quôk hội lơgar Việt Nam kung chờ hờp bal mờ lơgar Bangladesh bơyai lơh geh cồng nha Dơ̆ tĕ khà mờr tus, lơh jăt geh cồng nha “Broă rơndăp lơh tus nam 2041”, ai lơgar Bangladesh gơ gơs là dà lơgar lơh sa mờ măy mok jak chài pa mờ bơta ngăc ngar tàm nam 2041 di dơ̆ tơngkah kir sơnrai 70 nam ngai crơng gơs dà lơgar. Bàr nă kwang đơng lam bồ Quôk hội đơs nền sền dờng màng gĭt gơ̆p lơh bơyô bal ờs mờng bơh yau đag lơgar Việt Nam mờ Bangladesh; neh cribơyai mờ dùl nùs ring bal bàr pe jơnau pơlam gùng dờng nàng kờñ ai gĭt gơ̆p lơh broă bal đah 2 lơgar gơguh uă rlau tai.

Mho ngai 21/09, tàm hìu duh broă Họk viện Cribơyai broă mờ lơgar ndai lơgar Bangladesh dê, Đại sứ lơgar Việt Nam tàm lơgar Bangladesh ồng Nguyễn Mạnh Cường neh koh biài sơnđờm mŭt lơh dơ̆ Ràng tơlik rùp 50 nam gĭt gơ̆p lơh bơyô bal ờs mờng bơh yau mờ lơh broă bal đah Việt Nam mờ Bangladesh bơh Anih Yal tơngĭt jơnau Việt Nam dê bơyai lơh.