VOV4.K’ho- Drim ngai 16/5, tàm Hìu lơh broă Quôk hội, Củ tịc Quôk hội lơgar Lào ồng Saysomphone Phomvihane neh bơyai lơh dơ̆ wă rò ngan ngồn Củ tịc Quôk hội ồng Vương Đình Huệ. Tơnơ̆ dơ̆ wă rò, 2 Củ tịc Quôk hội neh lam lơh tìp mat cribơyai broă. 2 Củ tịc Quôk hội đơs nền, tềng đap ală broă gơlik geh kal ke tŭ do tàm lơgar mờ tàm tiah do, 2 gah ngai sơlơ sền gŏ loh bơta kuơ bơh broă gàr sùm mờ bơt bơtàu git gơp lơgar rềp bal đềt mềr, jơh nùs gơ wèt tus mờ bơta lơngap lơngai mờ bơtàu tơnguh bơh Việt Nam mờ Lào dê, sền hơ̆ là bơta pal geh bơh bơtàu tơnguh dê, geh kuơ kis jŏ mờ là dùl tàm ală bơta lơh nền tus broă gàr niam jai pha bơh broă lơh kac màng tơl lơgar dê.

Bè gùng dà lơh broă bal tàm tơngai tus, 2 gah ring bal chồl pràn tàm pơ gơl mpồl kwang bàng, tìp mat đah Kwang đơng lam bồ Quôk hội mờ đah ală Ủy ƀan bơh Quôk hội 2 lơgar, Mpồl Nghị sĩ lơh bơyô, Mpồl ùr kwang bàng Quôk hội, Mpồl kwang bàng Quôk hội kơnòm să, đah ală mpồl kwang bàng Quôk hội mờ Hội đồng Ñân zân kâp càr bơh 2 lơgar dê; pơgồp bal bơyai lơh ală dơ̆ pơrjum, cribơyai tam pà mờng chài tàm ală gah broă lơh bơh Quôk hội dê.

Cau mblàng K’Duẩn