Tàm Hìu lơh broă Quôk hội, Củ tịc Quôk hội ồng Vương Đình Huệ geh dơ̆ tìp mat cribơyai broă ngan ngồn mờ Củ tịc Thượng viện lơgar Bỉ mò Stéphanine D’Hose. Bàr nă kwang đơng lam bồ Quôk hội/ Nghị viện đơs niam ală cồng nha niam ngan tàm bơta git gơp lơh broă bal lơh broă sa đah 2 lơgar tàm tơngai lài. Củ tịc Quôk hội ồng Vương Đình Huệ đơs là, bơta pràn lơh broă bal đah 2 lơgar bè kă bro- bơcri priă gam dờng ngan. Tàm bơta ală lơgar gam tơnguh ală mpồl bơcri priă, 2 lơgar pal pơn jat tai lơh broă bal mờ ròt mpồl bơcri priă tŭ do mờ lơh geh ală mpồl bơcri priă pa.

Củ tịc Quôk hội sồr, Bỉ lơh gơlik bơta ƀuơn ai phan bơna tac hờ lơgar ndai bơh Việt Nam dê geh mut tàm drà kă bro lơgar Bỉ mờ câu Âu, ngan là phan tàm dà, phan lơh gơs bơh suơn sre ờs mờng bơh Việt Nam dê bè phe, kơpphê… Đơs sùm, tam gơl sồ mờ tam gơl năng lượng là 2 broă lơh tam gơl cèng bơta gùt plai ù mờ Bỉ là lơgar bơtàu tơnguh ngan tàm 2 gah broă do, Củ tịc Quôk hội ồng Vương Đình Huệ kơp kờñ Nghị viện Bỉ tam pà mờng chài bơt bơtàu kơrnuat boh lam mờ Quôk hội Việt Nam.