Tàm dơ̆ tìp mat cribơyai broă, Củ tịc Quôk hội ồng Vương Đình Huệ pin dờn là, tềng đap bơta đơng lam bồ bơh Kwang atbồ lơgar, Củ tịc Thượng viện mờ Củ tịc Hạ viện dê, dà lơgar Philippines geh ngai sơlơ pas sơm, bơtàu tơnguh; gơnoar broă mờ bơta kuơ ngai sơlơ gơguh jơnhua tàm tiah do mờ tàm dunia.

Bàr Củ tịc Quôk hội đơs niam git gơp lơh broă bal đah Quôk hội 2 lơgar tàm jơh bal 2 gah mờ uă gah; đơs nền gơnoar broă lơh tờm bơh lơh broă bal nghị viện dê tàm broă sơlơ tơnguh git gơp uă gah kung bè git gơp 2 gah đah ală lơgar. Tàm tơngai tus, 2 nă kwang đơng lam bồ ring bal geh pơn jat tai gàr sùm broă lơh tàm pơ gơl, cribơyai broă mpồl kwang bàng, kuơmàng là mpồl kwang đơng lam bồ kâp dờng bơh Quôk hội 2 lơgar dê; sơlơ tàm cribơyai mờng chài đah ală Ủy ƀan bè broă lơh crơng gơs adat boh lam mờ jat sền; gàr sùm broă tàm lùp, pơgồp bal mờ tàm dong kờl bal mờ gơp tàm ală mpồl lơh broă bal uă lơgar.