Tàm dơ̆ tìp mat cribơyai broă, 2 nă kwang đơng lam bồ neh cribơyai mờ ring bal bè ală broă lơh sơlơ tơnguh lơh broă bal 2 gah tàm tơngai tus nàng dipal mờ bơta pràn dờng màng ngan bơh 2 lơgar dê. Bàr nă kwang đơng lam bồ ring bal sơlơ tơnguh tàm pơ gơl cribơyai kwang bàng ala kâp, ală gah broă nàng sơlơ tơnguh rlau tai bơta pin dờn cíñ trị, lơh bơnàng jă nàng bơtàu tơnguh git gơp uă gah đah Việt Nam mờ Iran. Tàm gah lơh sa, Củ tịc Quôk hội sồr 2 gah sơlơ lơh gơlik bơta niam ai ală bơta phan geh bơta pràn bơh gơp dê, ngan là ală phan lơh gơs bơh suơn sre, phan tàm dà geh mut tàm drà kă bro tơl lơgar dê; sơlơ lam lơh ală broă lơh hòi jà kă bro, bơcri priă, tàm tơrbŏ bal mpồl lơh sa kă bro, ală càr, ƀòn dờng 2 lơgar; sơlơ tơnguh lơh broă bal bơto bơtê mờ bơsram, khoa họk- kông nghệ, niam chài- đơs crih tam ya.