Tàm dơ̆ tìp mat, Củ tịc Quôk hội ồng Vương Đình Huệ pơyua tus ồng Manuel Marrero Cruzz jơnau lùp còp jơh nùs mờ ală nùs nhơm đềt mềr kuơmàng ngan rlau jơh bơh Quôk hội mờ làng bol Việt Nam dê; đơs nền Đảng, Dà lơgar, Cíñ phủ, Quôk hội mờ làng bol Việt nam sùm lòt bal, tò dong broă lơh kac màng dờng màng bơh làng bol lơgar Cuba oh mi dê. Củ tịc Quôk hội yal mờ Thủ tướng lơgar Cuba bè broă tam gơl pa mờ ală broă lơh bơh Quôk dê rềp ndo, tă pơgồp tàm bơtàu tơnguh lơh sa- mpồl bơtiàn, mut gơ rờm bal dunia bơh lơgar Việt Nam dê.

Yal bè ală bơta bơtàu tơnguh tàm git gơp đah Quôk hội 2 lơgar. Tàm tơngai tus, Củ tịc Quôk hội ồng Vương Đình Huệ đơs nền, Quôk hội Việt Nam rơp pơn jat tai lơh broă bal jơh nùs mờ Quôk hội Cuba nàng kờñ lơh gơlik bơta ƀuơn ai ală mpồl lơh sa kă bro 2 lơgar in sơlơ tơnguh bơta git gơp lơh sa, kă bro, bơcri priă bơtàu tơnguh dipal mờ bơta git gơp cíñ trị niam bơnĕ đah 2 lơgar, di nùs nhơm đơng lam mờ bơta kơp kờñ bơh ală kwang đơng lam bồ kâp dờng 2 lơgar dê.