Củ tịc Quôk hội ồng Vương Đình Huệ đơs nền, Việt Nam sền dờng màng mờ lơh ngan sơlơ tơnguh bơta git gơp lơh broă bal jŏ jòng mờ lơgar Malaysia ngai sơlơ bơtàu tơnguh tàm jơh ală bơta, ngan ngồn mờ geh cồng nha. Bơh bơta git gơp cíñ trị niam bơnĕ mờ tàm pin dờn bal mờ gơp, Củ tịc Quôk hội ồng Vương Đình Huệ mờ Thủ tướng Malaysia ồng Anwar Ibrahim neh cribơyai sơrmah sơrmài bè uă gah lơh broă bal đah 2 lơgar tàm tơngai tus, sơlơ tơnguh broă lơh sir ală jơnau ring bal lơh broă bal kuơmàng đah 2 lơgar.

2 gah đơs sùm bơta kuơmàng bơh broă sơlơ tơnguh kă bro 2 gah jat gùng dà ring bal rlau; pơgồp bal sền sơ wì, kơlôi sơnơng, lơh kơrnuat sơlơ tơnguh lơh broă bal tàm broă kup, lơh gơlik mờ tac phan tàm dà lềng tài do là gah broă mờ 2 gah geh jơnau kờñ mờ gơtùi tàm bơ tơl gơp in; tò dong lơh broă bal, dong kờl mpồl lơh sa kă bro tàm lơgar Việt Nam tàm gah lơh sa mờ măi mok phan sa Halal mờ Malaysia geh bơta pràn mờ Việt Nam geh uă bơta pràn. Thủ tướng Malaysia ring bal sền sơ wì, tơnguh blơi 2, 3 bơta phan bơh Việt Nam dê.