Tàm dơ̆ tìp mat, Củ tịc Quôk hội ồng Vương Đìn Huệ sồr ồng Samdech Techo Hun Sen tàm gơnoar broă dờng màng là Củ tịc Đảng Làng bol Campuchia, Thủ tướng lơgar Campuchia.

Tàm gơnoar broă, ồng pơn jat tai sền gròi, đơng lam sơlơ tơnguh git gơp mờ lơh broă bal tơl làm đah 2 lơgar, tàm hơ̆ geh lơh broă bal sền gàr dà lơgar, sền gàr lơngăp lơngai, tiah nhàr dà lơgar, kă bro, bơcri priă, lơh sa suơn sre, bơto bơtê mờ bơsram, nhơl chờ, tìp mat lơh kwèng làng bol, lơh broă bal đah ală tiah, lơh gơlik bơta ƀuơn nàng mpồl bơtiàn cau jơi Việt Nam gàr kơ̆ kơljap rài kis, tă pơgồp uă ngan ai bơta bơtàu tơnguh, pas sơm bơh lơgar Campuchia mờ git gơp đah 2 lơgar dê.