Củ tịc Ủy ƀan Mặt trận Dà lơgar Lo ồng Vương Hộ Ninh jờng rơ Củ tịc Quôk hội ồng Vương Đình Huệ tus còp ngan ngồn lơgar Lo dơ̆ sơnrờp tàm gơnoar broă pa. Bàr nă kwang đơng lam bồ ring bal lơh jrô ơnàng làm uă lơh broă bal đah Mặt trận Dà lơgar Việt Nam mờ Ủy ƀan Mặt trận Dà lơgar Lo, sơlơ tơnguh cribơyai mờng chài lơh broă nàng lơh jat niam ngan rlau jơh, geh cồng nha ngan rlau jơh gơnoar broă bơh tơl mpồl lơh broă tàm rài kis cíñ trị bơh tơl lơgar dê.

Củ tịch Quôk hội sồr 2 gah sơlơ tơnguh lơh broă bal kă bro gơguh jat gùng dà ring bal, kơ̆ kơl jăp; sơlơ tơnguh lơh broă bal, tàm tơrbŏ bal tàm gah lòt rê tàm gùng ù gờl, gùng rơndeh ồs, pơn jờng mpồl lơh sa kă bro lơgar Lo bơcri priă lơh ală rơndăp broă lơh dờng, geh bơta niam uă, pơn rơ ngan ai bơta gĭt wă bơtàu tơnguh bơh lơgar Lo dê; bơyai lơh niam ală broă lơh tìp mat lơh bơyô bal, tìp mat lơh kwèng làng bol bè dơ̆ tàm pơrlòng ơruh pơnu, dơ̆ pơrjum cribơyai làng bol, tìp mat lơh kwèng đah ală kwang bàng Mặt trận Dà lơgar Việt Nam mờ Ủy ƀan Mặt trận Dà lơgar Lo bè kông đoàn, cau ùr.

Tàm dơ̆ lòt còp ngan ngồn lơgar Kộng hoà Làng bol lơgar Lo bơh Củ tịc Quôk hội ồng Vương Đình Huệ dê, drim ngai 09/04, tàm Bắc Kinh, Gah rơndeh par dà lơgar Việt Nam (Vietnam Airlines) bơyai lơh Dơ̆ tơngkah 30 nam gùng par mờ chờ gờm wă rŏ dơ̆ par 100 rbô dơ̆ tàm gùng par Việt Nam mờ Lo.

Tàm pe jơ̆t nam do, kờp bơh tŭ sơnđờm mŭt tàm drà kă bro lơgar Lo, Vietnam Airlines neh lơh 100 rbô dơ̆ par, jun pơndiang rlau 11 tơlak dơ̆ năc lòt mờ 166 rbô tấn phan kă bro. Pal sền ngăc, sơrlèt ală kal ke bơh kòp Kovid-19 dê, Vietnam Airlines là dùl tàm ală Gah rơndeh par bơh sơnrờp lơh wơl gùng par tus lơgar Lo mờ jơh nùs lơh sùm ală broă lơh hòi jà lơh broă gah rơndeh par, lòt nhơl tàm do tơnơ̆ tŭ kòp dờng geh kơryan. Tàm broă lơh tơngkah do, Vietnam Airlines mờ ală cau tam klăc lơh broă bal bơh lơgar Lo dê neh kĭ sră hơ lơh broă bal lơh sa kă bro mờ sơlơ pơgồp bal, lơh broă bal tàm ală gùng par đah Việt Nam mờ Lo.