Củ tịc Quôk hội ồng Vương Đình Huệ đơs sùm, Việt Nam kơ̆p kờñ 2 gah sơlơ tơnguh kă bro kơ̆ kơljap, ring bal, lơh geh ală bơta blơi uă phan bơna lơh geh bơh gah lơh sa suơn sre bơh lơgar Việt Nam dê tus lơgar Australia mờ sơlơ̆u wơl.

Củ tịc Quôk hội sồr ồng David Hurley sền gròi, lơh pràn lơh broă bal tàm gah lơh broă, ngan là rề ơnàng lơh broă bal mờ bơta chài lơh sa suơn sre mờ lòt nhơl pơgồp bal mờ lơh broă; sơlơ tơnguh bơta gĭt gơ̆p đah ală tiah bơh 2 lơgar dê. Củ tịc Quôk hội ồng Vương Đình Huệ ưn ngài lơgar Australia dong kờl Việt Nam tơlik mat mŭt tàm mpồl bơh Mpồl duh broă gơnoar Kòn bơnus Liên hợp quôk dê tơngai lơh broă bơh nam 2023- 2025, tam pà bal uă nùs nhơm ndrờm bal tàm ală dơ̆ cribơyai tàm tiah do mờ tàm dunia. Kwang ala mat lơgar Australia ồng David Hurley ring bal mờ jơnau đơs bơh Củ tịc Quôk hội dê bè bàr pe gah lơh broă bal pa đah Anih lơh adat boh lam 2 lơgar dê, đơs là, do là ală gah kwơ màng, cèng wơl bơta kwơ ai jơh bal 2 gah in, den tàng, pal sền gròi tus ală gah broă do, lùp bơsram bơta mờng chài tàm lài do mờ ai hơ̆ lơh bơnàng jă kơ̆ kơljap nàng sơlơ tơnguh bơta gĭt gơ̆p đah 2 gah tàm rài tơnơ̆ do.