Tàm dơ̆ tìp mat, 2 nă kwang đơng lam bồ đơs, bơta git gơp lơh broă bal tơl làm đah Việt Nam mờ Argentina tàm tơngai lài pơn jat tai bơtàu tơnguh niam, ngan ngồn mờ geh cồng nha, bơh broă tàm pơgơl cribơyai mpồl kwang bàng mờ tìp mat kwang bàng kâp dờng; ală Mpồl lơh broă bal bè Ủy ƀan 2 Cíñ phủ mờ tàm lùp cíñ trị đah 2 Ƀộ Ngoại giao geh lam lơh jat tơngai pơrjum, ngac ngar bè broă lam lơh, kờp bal mờ tàm tơngai kòp dờng Kovid-19.

2 nă kwang đơng lam bồ ring bal lơh niam rlau tai bơta git gơp cíñ trị- cribơyai broă mờ lơgar ndai, tìp mat lơh kwèng làng bol, mờ kung ngui bơta ƀuơn ală bơta phan gơtùi tàm dong kờl bal mờ gơp nàng kờñ lơh ngan bal mờ gơp ai priă lơh geh gơguh tus khà 10 tơmàn dolar Mỹ tàm nam 2025. Củ tịc Quôk hội ồng Vương Đình Huệ đơs nền, broă sơlơ tơnguh bơta git gơp lơh broă bal đah Quôk hội 2 lơgar pơgồp bơnah kuơmàng ngan sơlơ tơnguh bơta git gơp 2 lơgar đơs bal kung bè bơt bơtàu mờ lam lơh jat adat boh lam ƀuơn ƀuài đah 2 lơgar đơs is.