VOV4.K’ho- Lơh jat jat broă lơh pơrjum dê, ngai 29/09, Củ tịc Quôk hội ồng Vương Đình Huệ mờ Mpồl kwang bàng Quôk hội ƀòn dờng Hải Phòng neh tìp mat mờ cau tĕ khà tàm kơnhoàl Thủy Nguyên, ƀòn dờng Hải Phòng lài mờ tŭ bơyai lơh pơrjum dơ̆ 4, Quôk hội khoá 15 dê. Tàm dơ̆ tìp mat, cau tĕ khà kơnhoàl Thủy Nguyên, ƀòn dờng Hải Phòng tơngŏ bơta pin dờn, chờ hờp tềng đap cồng nha bơtàu tơnguh bơh dà lơgar dê; tàm bơta đơng lam bơh Đảng, Quôk hội, Cíñ phủ tềng đap ală bơta kal ke tài bơh kòp Kovid-19 mơya neh đơng lam, sồr lơh dà lơgar lơh geh ală cồng nha pal cih dờp ngan. Quôk hội geh ală gùng dà broă lơh kràñ cê jơh nùs, di tŭ, di pal nàng kờñ tă bơsong ală bơta kal ke bơh làng bol mờ mpồl lơh sa kă bro dê.

Củ tịc Quôk hội ồng Vương Đình Huệ tìp mat mờ cau tĕ khà ƀòn dờng Hải Phòng             

Hơ jơnau lùp bơh cau tĕ khà dê bè gah broă lơh sơnơm, tàm hơ̆ sồr Quôk hội geh broă lơh lơh nền giă sơnơm, gàr niam broă tăc tơl sơnơm kham sơm kòp, Củ tịc Quôk hội ồng Vương Đình Huệ đơs là, tơngai pa do, geh uă jơnau gơbàn gơtùi rcang gĭt lài mờ jơnau gơbàn ờ gơtùi rcang gĭt lài gơlam tus ală bơta do. Quôk hội, Cíñ phủ gam đơng lam, sồr lơh jat gùng dà pal ai tơl, bơta niam mờ giă tăc sơnơm sơm kòp dê.  

VOV Tây Nguyên- Cau mblàng K’Hạnh