Tàm dơ̆ tìp măt, Củ tịc Quôk hội ồng Vương Đình Huệ đơs sùm, 40 nam do, Mpồl Cau ùr Ƀộ Kwang àng sùm dờng pràn bè jơh ală bơta, bơh ală mpồl, gùng dà lơh broă tus khà cau tàm mpồl mờ bơta niam mờ bơtàu tơnguh ală srơh bơh cau ùr dê. Mpồl gam là tiah nàng tơl nă cau tàm mpồl in bơsram tàp, đơs nền să tờm he, mờ là bơta gơn kơnờm nàng ală oh mi kơ̆ dơn nùs nhơm lơh ngan pơđơl pràn sùm tă pơgồp dà kơlhề mờ sùm gơguh jak, bơh ală srơh ờ mìng lơh geh jơnau pơnrơ tàm mpồl bơtiàn mờ gam lời wơl jơnau kah wơl niam ngan, jrô ơnàng bè rùp hin cau ùr kwang àng làng bol, bè: Srơh “Pe jak chài ală broă”, Srơh “Cau ùr Kwang àng jak broă dà lơgar, sir tơl broă hìu”...Bơh ală srơh hơ̆, geh uă krơh cau ùr Kwang àng khin cha, uă oh mi cau ùr gơ gơs là cau jak chài tàm broă lơh, cau kơlôi sơnơng jak chài, cau geh bơngă pin dờn tàm gah lơh broă mờ tàm mpồl bơtiàn; khà cau ùr kwang bàng geh pồ ăt gơnoar broă đơng lam bồ ngai sơlơ gơguh. Củ tịc Quôk hội đơs là, tềng đăp jơnau sồr bơtàu tơnguh pa bơh Dà lơgar dê, Đảng, Dà lơgar he ngai sơlơ lời ai bơta sền gròi, drơng gàr, bơtàu tơnguh tơl làm mờ jrô ơnàng gơwèt mờ cau ùr lơgar he, tờm tơn là broă lơh hòi jà cau ùr, tài jơnau kờñ ring bal, chờ hờp chờ hờñ mờ gơguh jak cau ùr cau klau. Củ tịc Quôk hội sồr, Kwang bàng, cau ùr kwang àng làng bol lơh ngan pơđơl pràn, bơsram tàp, ngac ngar jak chài, sơrbac mhar tàm broă lơh, sơrlèt gan kal ke, bơta ờ pràn jak tài bơh bơta mùl gŏ is cau ùr cau klau dê.