Uă jơnau cih sră ƀăo bơh ală cau tàm mpồl Kâu lạc ƀộ cau ùr lơh ƀăo lơgar Việt Nam geh kwơ, cih yal loh làng ală bơta tàm rài kis, pơgồp bơnah uă ngan tàm broă lơh tam gơl pa, bơtàu tơnguh dà lơgar, uă jơnau cih neh geh khà jờng uă ngan tàm ală dơ̆ tàm pơrlòng sră ƀăo bơh ală tiah, ƀộ, ngàñ, mpồl ling phàu crong mờ khà jờng sră ƀăo Dà lơgar dê.

Đơs tàm dơ̆ tìp mat, Củ tịc Quôk hội ồng Vương Đình Huệ đơs sùm, Quôk hội ală khoă ndrờm sền dờng màng gơnoar broă bơh cau lơh ƀăo dê, ngan là ală anih lơh broă làng bol pồ bơh Dà lơgar tus ală tiah kung geh cau ala mat ai ală anih lơh broă sră ƀăo dê. Tàm tơngai tus, Củ tịc Quôk hội sồr mpồl cau lơh ƀăo lơgar he pal lơh jat tơl làm, jrô ơnàng làm uă rlau tai nùs nhơm, sră ƀăo là phan tam lơh kwơ màng ngan, là phan ngui tờm ngan bơh Đảng dê tàm ală gah bồ tơngoh. Di dơ̆ do, Củ tịc Quôk hội gờm chờ ală cau ùr  lơh ƀăo mờ Kâu lạc ƀộ ùr cau lơh ƀăo Việt Nam dê “sùm sùm sơnam 20” bè nùs nhơm bơh cau ling chơ̆t màng, ƀák sĩ Đặng Thùy Trâm dê; sùm gàr geh “bồ tơngoh ngăc ngar, nùs nhơm sàng goh, cih jơnau jak ngan” mờ ngan ngồn là “ală gai cih mờ lòs”.