VOV4.K’ho- Mho mang ngai 02/06, tàm Hìu Quôk hội, Củ tịc Quôk hội ồng Vương Đình Huệ neh tìp măt Mpồl kwang bàng Quôk hội kơnòm să. Củ tịc Quôk hội đơs niam ngan broă lơh bơh mpồl kwang bàng Quôk hội kơnòm să dê bơh tŭ crơng gơs tus tŭ do, ală kwang bàng kơnòm să neh lơh jăt niam tàm ală dơ̆ pơrjum bơh Quôk hội khoă XV dê.

Tàm hìu pơrjum Quôk hội, ală kwang bàng kơnòm să ngac ngar, ñhap ñhar, jơh nùs jơh tồr, geh ală jơnau đơs jak chài ngan, ngac ngar ngan, tơl làm ngan mờ geh cau tĕ khà cih dờp. Nàng pơn jăt tai lơh jăt niam gơnoar broă, kơnòl broă mờ tơnguh uă cồng nha, bơta niam lơh broă, tàm tơngai tus, Củ tịc Quôk hội ồng Vương Đình Huệ sồr, ală kwang bàng Quôk hội kơnòm să pơn jăt tai bơsram tàp lơh ngan jăt tơl jơnau sồr bơh kwang bàng Quôk hội dê bè nùs nhơm cíñ trị, bồ tơngoh bơsram sră, bồ tơngoh bơsram broă lơh, broă lơh ờs mờng; lời jơh nùs nhơm, bồ tơngoh ai ală broă lơh bơh Quôk hội dê in.

Cau mblàng Lơ Mu K’Yến