VOV4.K’ho- Mho ngai 27/01, tàm hìu lơh broă Quôk hội, Củ tịc Quôk hội ồng Vương Đình Huệ tìp mat, nting bơr sa tềp kwang đơng lam bồ Quôk hội, kwang bàng Quôk hội lơh kơnòl broă sùm tàm dà lơgar, kwang bàng, kông cứk, viên cứk, cau lơh broă bơh Cơldŭ lơh broă Quôk hội dê; tus bal dơ̆ pà khà jờng nisơna gơ wèt tus mờ mpồl cau, cau dùl nă să geh cồng nha jak ngan tàm broă ai tơlik jơnau đơs, jơnau bơceh pa, drơng pơrjum nisơna dơ̆ dùl, Quôk hội khóa 15. Đơs tàm dơ̆ bơyai lơh, Củ tịc Quôk hội ồng Vương Đình Huệ đơs nền, lơgar he neh lòt gan nam 2021 mờ bềng ngan bơta bòl glar, kơlôi rơcang, bơta lòng.

Bơta krơi is bơh Quôk hội dê là lơh broă bal. Ală dơ̆ pơrjum bơh Quôk hội dê, ală dơ̆ pơrjum jat broă lơh mpồl bal. Den tàng, kòp Kovid-19 neh gơ rềng uă ngan tus broă lơh bơh Quôk hội dê. Củ tịc Quôk hội ồng Vương Đình Huệ jờng rơ, cih dờp mờ đơs niam bơta tă pơgồp jơh nùs ngan, geh kơnòl, geh bồ tơngoh jak bơh jơh ală kwang bàng, kông cứk, viên cứk, cau lơh broă gơ wèt Cơldŭ lơh broă Quôk hội, kơp kờñ nam 2022, tơl nă kwang bàng, kông cứk, viên cứk, cau lơh broă gơ wèt Cơldŭ lơh broă Quôk hội pal mờng chài rlau, tơl khà rlau, geh kơnòl rlau mờ tam klac rlau tai, nàng geh cồng nha jak rlau nam 2022.

Cau mblàng K’Duẩn