Củ tịc Quôk hội ồng Vương Đình Huệ pà gĭt, Quôk hội lơgar Việt Nam mờ să tờm Củ tịc Quôk hội jờng rơ uă ngan bơta gĭt gơ̆p lơh bơyô bal mờ lơh broă bal đah 2 lơgar dê, jơh bal tàm gah Cíñ phủ mờ Nghị viện. Bàr gah neh kĭ uă sră nggal jơnau ring bal lơh broă bal, ngan là broă lơh geh tơngume Lơh broă bal kwơ màng bè priă jền tơlir; ưn ngài lơgar Luxembourg neh mờ gam pơn jat tai lời ai lơgar Việt Nam in bơta kờñ gơ boh- ngan là tàm gah tơrmù rƀah mờ sơndră wơl tam gơl trồ tiah, lơgar Luxembourg là dùl tàm ală lơgar gờñ ring bal Hiệp địñ Sền gàr dong kờl bơcri priă Việt Nam mờ EU (EVIPA).

Thủ tướng lơgar Luxembourg pà gĭt, ngai 05/05, 2 gah bơyai lơh dơ̆ cribơyai lơh sa mờ bơta tus bal bơh 25 mpồl lơh sa kă bro lơgar Luxembourg dê. Tơngŏ niam ngan bè broă lơh lơh sa bơh lơgar Việt Nam dê tàm tơngai dunia gam geh gơmù lơh sa, Thủ tướng lơgar Luxembourg đơs là, lơgar Việt Nam ờ mìng sền gròi bơtàu tơnguh lơh sa, mờ gam sền gròi broă tơrmù nhơm bơ̆ tuh tơlik bơdìh. Di dơ̆ do, Thủ tướng lơgar Luxembourg kơ̆p kờñ, lơgar Việt Nam gờñ sang tĕ visa gơwèt mờ làng bol lơgar Luxembourg nàng lơh geh bơta ƀuơn ƀoài ai broă sơlơ tơnguh lơh broă bal lơh sa, kă bro mờ tìp mat lơh kwèng làng bol dê. Tàm dơ̆ tìp mat, 2 nă kwang đơng lam bồ kung dùl nùs bal bè broă pal sơlơ tơnguh pràn kơl dang rlau tai tàm gah priă jền tơlir; kơ̆p kờñ bal mờ gơ̆p dong kờl dùl rài lơh sa tơlir, priă jền tơlir.