VOV4.K’ho- Tàm Hìu Quôk hội dê, Củ tịc Quôk hội ồng Vương Đình Huệ tìp măt ùr kwang bàng Quôk hội sùm lơh kơnòl broă tàm Dà lơgar mờ ùr kwang đơng lam bồ, ătbồ kâp vụ bơh Cơldŭ lơh broă Quôk hội dê di Ngai Dunia Cau ùr 08/03.

Củ tịc Quôk hội ồng Vương Đình Huệ jờng rơ, đơs niam ngan ală broă lơh ngan, pơđơl pràn sùm bơh tơl nă kwang bàng Quôk hội dê, tàm hơ̆ geh ală ùr kwang bàng lơh broă sùm lơh kơnòl broă bơh tơngai lơh broă Quôk hội khoă XV dê. Gơwèt mờ Quôk hội, ală tơngai lơh kơnòl broă pa do, Quôk hội Việt Nam sùm geh khà ùr kwang bàng Quôk hội ơm tàm khà uă pơndrờm mờ ală lơgar tàm kơnhoàl ù tiah do mờ tàm dunia; cồng nha mờ gơnoar broă bơh ală ùr kwang bàng Quôk hội dê ngai sơlơ geh tơnguh tai.

Tềng đăp ală jơnau sồr kơnòl broă bơh dà lơgar dê tàm tŭ tơngai bơtàu tơnguh pa, Củ tịc Quôk hội ồng Vương Đình Huệ sồr: Ală ùr kwang bàng Quôk hội lơh broă sùm lơh kơnòl broă tàm Dà lơgar mờ ùr kwang đơng lam bồ, ătbồ kâp vụ bơh Cơldŭ lơh broă Quôk hội dê pơn jăt tai bơsram, tơnguh uă bồ tơngoh gĭt wă, pơgồp bơnah tơnguh uă rlau tai bơta niam mờ cồng nha lơh broă bơh Quôk hội dê; tus bal lơh geh cồng nha tàm ală tŭ rơndăp lơh gùng dà broă lơh tàm gah broă lơh sền gàr gơnoar kwơ cau ùr mờ kơnòm dềt dê, lơh jăt jơnau kờñ ring bal ùr klau, lơh sir niam kơnòl broă bơh Cau Kwang bàng ala măt làng bol dê, dipal mờ bơta pin dờn, kờñ gơboh mờ bơta sac rwah pồ bơh cau tĕ khà mờ Làng bol jơh gùt lơgar dê.

            Cau mblàng Lơ Mu K’Yến