VOV4.K’ho - Mho òr (28/06), tơnơ̆ mờ tŭ mù tàm ƀlàng rơndeh par London Heathrow sơn đờm dơ̆ tus còp mùl màl lơgar Anh, Củ tịc Quốk hội ồng Vương Đình Huệ bal mờ mpồl kwang bàng dờng màng Quốk hội lơgar he neh tus còp Đại sứ quán mờ tìp mpồl cau lơgar Việt Nam kis tàm lơgar Anh.

              Củ tịc Quốk hội ồng Vương Đình Huệ tìp mờ mpồl cau lơgar Việt Nam kis tàm lơgar Anh

Bơh cri bơyai, tam pà bal bơh ală mpồl cau lơgar Việt Nam dê, Củ tịc Quốk hội ồng Vương Đình Huệ neh đơs niam làng bol neh tam klăc bal, tơrgùm bal geh cồng nha mờ lơgar gam ơm kis tŭ do. Kwơ màng là ală broă lơh mùl màl bơh ală mpồl lơh broă neh tam pà bal, wèt tus hờ lơgar tờm bơh ală broă lơh mùl màl. Khà rơlao 3 tơlăk 500 rơbô dolar Mỹ priă dong kờl ai làng bol tàm lơgar in tàm dơ̆ gơtìp kòp gơtờp pa do là cơng tàng pà gŏ bơta do. Ală nùs nhơm hơ̆ pal geh sền dờng màng ngan. Củ tịc Quốk hội đơs tờm, geh broă dờng pràn mờ tơnguh bơtàu bơh ală mpồl tàm tơngai do, kơnờm bơh broă pơgồp bal uă ngan bơh Đại sứ quán lơgar Việt Nam tàm lơgar Anh dê. Củ tịc Quốk hội kung kơ̆p kờñ, mpồl cau lơgar Việt Nam kis tàm lơgar Anh pơn jăt tai tam klăc bal, sền gròi rơlao tai tus mờ ală rơnàng cau lơgar Việt Nam nàng geh gŏ, yal ală cau ngăc ngar jăk chài tàm ală gah broă lơh.

Cau mblàng Ndong Brawl