Mờ mờr 60 broă lơh tàm bàr lơgar, tơngai lơh broă geh uă tơnơ̆ mờ tŭ mù ƀlàng rơndeh par, dơ̆ còp mùl màl tus bàr lơgar Indonesia mờ tus Pơrjum dờng Mpồl duh broă AIPA-44; còp mùl màl lơgar Iran bơh Củ tịc Quốk hội ồng Vương Đình Huệ bal mờ Mpồl kwang bàng ala măt kấp dờng Quốk hội lơgar he neh geh uă cồng nha niam bơnĕ ngan.

Quốk hội lơgar Việt Nam mờ lơgar Indonesia mờ lơgar Việt Nam mờ lơgar Iran neh kĭ jơnau ring bal lơh broă bal pa nàng di pal mờ bơta git gơ̆p đah bàr lơgar kung bè tơnguh lơh broă bal đah bàr Quốk hội, ring bal tơnguh broă tam gơl mpồl kwang bàng, cri bơyai broă mờng chài tàm ală gah broă lơh adăt boh lam kung bè broă pơgồp bal broă jăt sền, pơgồp bal tàm ală pơrjum dunia. Bơdìh hơ̆ tai, tàm dơ̆ tus còp do, ală ƀộ, gah lơh broă gơrềng bal kung neh kĭ hơ bal geh uă jơnau ring bal lơh broă bal tàm ală gah broă krơi is. Do là bơta tờm, là tŭ sơn đờm kwơ màng ai bơta git gơ̆p lơh broă bal đah bàr lơgar dê. Tus Pơrjum dờng mpồl duh broă AIPA-44, Củ tịc Quốk hội ồng Vương Đình Huệ kung neh geh ală dơ̆ tìp bal đah bàr lơgar nàng cri bơyai bal ală broă lơh pràn bơta git gơ̆p rơlao tai mờ ală lơgar lơh broă bal tàm tiah do.