Pơn jat dơ̆ lòt còp ngan ngồn lơgar Australia, mho ngai 02/12 (jat jiơ tiah do dê), tàm Hìu lơh broă Đại học RMIT, ƀòn dờng Melbourne, ƀang Victoria, Củ tịc Quôk hội ồng Vương Đình Huệ tus còp Cribơyai lơh broă bal lơh sa Việt Nam mờ Australia.

 Đơs tàm dơ̆ cribơyai, Củ tịc Quôk hội ồng Vương Đình Huệ đơs sùm, bơta gĭt gơ̆p cíñ trị pin dờn ngan mờ niam bơnĕ ngan đah 2 lơgar là bơnàng jă nàng ai bơta bơtàu tơnguh bè lơh broă bal tơl làm tàm jơh ală gah broă bơh Việt Nam mờ Australia dê. Dilah bơta gĭt gơ̆p niam bơnĕ pin dờn bè cíñ trị, lơh broă cribơyai mờ lơgar ndai là bơnàng jă, den lòt còp lơh kuèng làng bol là broă dong kờl pràn kơl dang ngan. Lòt còp lơh kuèng làng bol geh bơta tă pơgồp bơh năc lòt nhơl 2 lơgar dê. Tàm hơ̆, mpồl bơtiàn Việt nam tàm Australia pơgap 350 rơbô nă cau, là mpồl bơtiàn uă dơ̆ 5 bơh lơgar ndai kis mờ lơh broă tàm lơgar Australia. Củ tịc Quôk hội ồng Vương Đình Huệ đơs là, do là ală cau ala mat bơh nùs nhơm lơh bơyô bal, là broă dong kờl tàm bơta gĭt gơ̆p 2 lơgar dê, den bơta gĭt gơ̆p lơh sa kă bro mờ bơcri priă den gơlik wơl là bơta gơn kơnờm kwơ màng ai bơta gĭt gơ̆p lơh broă bal jŏ jòng bơh 2 lơgar dê.