VOV4.K’ho- Tàm Hìu lơh broă Quốk hội Hungary, tàm dơ̆ lòt còp ngan ngồn lơgar Hungary, Quốk hội Việt Nam mờ Quốk hội Hungary neh bơyai lơh dơ̆ cribơyai lơh atdat boh lam  dơ̆ 4 mờ tơngume “Lơh sir tơngume kơrnoat boh lam bè tơrmù tơlik bơdìh nhơm bơ̆ lơh bơ̆ bơl tiah ơm kis, năng lượng lơh gơlik wơl mờ lơh sa tơlir”.

Củ tịc Quốk hội ồng Vương Đình Huệ tus bal cribơyai lơh adat boh lam đah Quốk hội Việt Nam mờ Hungary

Củ tịc Quốk hội Việt Nam ồng Vương Đình Huệ mờ Củ tịc Quốk hội lơgar Hungary ồng László Kövér đơng lam dơ̆ pơrjum. Tàm dơ̆ cribơyai, ală kwang bàng Quốk hội, cau jak chài 2 lơgar neh cribơyai sơr mah sơr mài bè ală broă geh ai tơlik, ală bơta lòng pal bơsong tàm broă lơh lơh sir tơngume kơrnoat boh lam bè tơrmù tơlik bơdìh nhơm bơ̆  lơh bơ̆ bơl tiah ơm kis, năng lượng lơh gơlik wơl, broă lơh bè bơtàu tơnguh kơ̆ kơljap, trồ tiah mờ tơngume adat boh lam bè lơh sa tơlir. Đơs tàm dơ̆ pơrjum, Củ tịc Quốk hội Việt Nam đơs sùm, Việt Nam geh pơn jat tai lơh broă sơr băc mhar, pràn kơl dang mờ tơl làm, sền gròi tam gơl năng lượng tơlir, năng lượng lơh gơlik wơl mờ bơtàu tơnguh phan bơna gơ dờp mờ tam gơl trồ tiah; sền do là tơngai niam nàng sơlơ tơnguh broă lơh bơtàu tơnguh jat gùng dà tơlir, tàm pơdar, cacƀon ờ uă mờ kơ̆ kơljap.

Cau mblàng K’Hạnh