VOV4.K’ho - Rơcang ai broă jăt sền tơngu me bè broă lơh jăt adăt boh lam bè broă lơh jăt tềm pềr, sơndră mờ hoàc huơr pơhì pơhà tơngai bơh nam 2016 tus 2021, drim òr (23/08), tàm Hìu Quốk hội, Củ tịc Quốk hội ồng Vương Đình Huệ tus bal dơ̆ lơh broă bơh mpồl kwang bàng jăt sền Quốk hội dê mờ Ƀộ Tài cíñ.

Đơs tàm dơ̆ lơh broă, Củ tịc Quốk hội sồr Ƀộ Tài cíñ pal git di broă tềm pềr bè priă jền ờ di ndrờm bè jơntrơi koh nàng koh tơmù khà broă mờ di jăt bơta tàm adăt boh lam lơh jăt tềm pềr, sơndră mờ hoàc huơr pơhì pơhà. Jăt jơnau yal bơh Ƀộ trưởng Ƀộ Tài cíñ ồng Hồ Đức Phớc dê, bơh nam 2016 tus nam 2021, ală mpồl lơh broă bơh Ƀộ Tài cíñ neh tềm pềr geh rơlao 6 rơbô tơmàn đơng tàm broă lơh, sền nàng git, kĭ broă rơndăp lơh khà priă, tơn jơh khà priă, atbồ, ngui khà priă tàm kes priă dà lơgar. Kờp tus nam 2021, Ƀộ Tài cíñ neh tơmù cau lơh broă geh 106% khà broă rơndăp lơh, gơmù 36 mpồl lơh broă gam 28 mpồl. Củ tịc Quốk hội ồng Vương Đình Huệ đơs tờm, lơh jăt broă tềm pềr, sơndră mờ hoàc huơr pơhì pơhà ờ di pah nam tềm pềr geh nđờ priă, mờ bơta kwơ màng là sền wơl, bơsong ală bơta gơkòl, kal ke, bơceh lơh broă tơnguh bơtàu nàng ai geh khà gơguh priă jền.

Cau mblàng Ndong Brawl