VOV4.K’ho- Mang ngai 13/05, tàm ƀlàng dờng Hìu đơs crih ƀòn dờng Hải Phòng dê, geh bơyai lơh Dơ̆ lơh chờ bơkào Phượng pơr hê- Hải Phòng nam 2022, tơngkah kir sơnrai 67 nam Ngai tơngklàs Hải Phòng. Củ tịc Quôk hội ồng Vương Đình Huệ tus bal tàm dơ̆ lơh chờ.

Củ tịc Quôk hội ồng Vương Đình Huệ tus bal tàm dơ̆ lơh chờ bơkào Phượng pơrhê- Hải Phòng

Đơs tàm dơ̆ sơnđờm mut lơh chờ, Củ tịc Ủy ƀan Ñân zân ƀòn dờng Hải Phòng ồng Nguyễn Văn Tùng pà gĭt, tàm tơngai bơt bơtàu dà lơgar mờ sền gàr dà lơgar, Hải Phòng ndrờm geh ală rài đơs là “mpồng mut bơh Gơlăng Bơtau dê”, là tiah “Bềng càl rbŭt dờng”, mơkung là “pơngàr kơryan kơ̆ kơljap ngan” nàng sền gàr dà lơgar. Geh bơta sền gròi bơh Đảng mờ Dà lơgar dê, den Hải Phòng neh bơtàu tơnguh pràn mờ mhar ngan. Khà sồ bơta pràn tàm pơr lòng kấp càr bơh ƀòn dờng Hải Phòng dê ală nam pa do sùm geh tam gơl, năm tơnơ̆ geh săp sèng jơnhoa rlau mờ ală nam lài. Dơ̆ lơh chờ bơkào Phượng pơrhê – Hải Phòng nam 2022 là broă lơh kwơ màng nàng yal tơngĭt rùp hin, sơlơ lơh lila mờ tơnguh uă bơta niam ală phan bơna nhơl chờ; pơgồp bơnah tam gơl rơndap tap sèng lơh sa, bơtàu tơnguh lơh sa- mpồl bơtiàn bơh ƀòn dờng dê.

Cau mblàng K’Hạnh