Tàm dơ̆ lòt còp ngan ngồn lơgar Argentia, drim ngai 26/04 (jat jiơ tiah do dê), Củ tịc Quôk hội lơgar Việt Nam ồng Vương Đình Huệ neh geh jơnau đơs broă lơh dờng màng tàm broă lơh tơngkah kir sơnrai 50 nam bơta gĭt gơ̆p đah lơgar Argentina mờ Việt Nam tŭ do mờ rài tơnơ̆ do.

Jat Củ tịc Quôk hội ồng Vương Đình Huệ, bulah ơm ngài nggùl plai ù mờ bulah ơm tàm 2 kơnhoàl ù tiah, 2 jơi bơtiàn kung gam tam pà bal mờ bơtàu tơnguh ală bơta kwơ bal ngăc ngar mờ gơguh jak: hơ̆ là bơta kơ̆p kờñ lơngap lơngai is, làng bol lơh tờm mờ bơtàu tơnguh ai Dà lơgar, khat gơboh, kis chờ hờp mờ gơguh jak ai làng bol in. Jat hơ̆, 2 lơgar pal pơn jat tai sơlơ tơnguh bơta gĭt gơ̆p lơh broă bal đah kwang đơng lam bồ 2 lơgar, bơh ală dơ̆ lòt còp kwang bàng kấp dờng mờ tìp mat tàm ală dơ̆ cribơyai tàm tiah do mờ tàm dunia; lơh jat niam ngan gơnoar broă bơh gah Nghị viện 2 lơgar dê, ală Đảng cíñ trị; lơh jat niam gơnoar broă bơh ală mpồl broă cribơyai. Bàr gah pal ngui jơh ală tơngume mờ hiệp địñ khat gơboh kă bro, ngan là Mê-cô-xua, CPTPP, mơkung wèt tus FTA đah lơgar Việt Nam mờ Mê-cô-xua.