VOV4.K’ho - Tàm dơ̆ tus còp mùl màl lơgar Anh, ngai òr (30/06), Củ tịc Quốk hội ồng Vương Đình Huệ neh tus pơrjum cri bơyai lơh broă bal bơto bơtê mờ bơsram đah lơgar Việt Nam mờ lơgar Anh.

Củ tịc Quốk hội ồng Vương Đình Huệ tus pơrjum lơh broă bal bơto bơtê mờ bơsram đah lơgar Việt Nam mờ lơgar Anh

Đơs tàm dơ̆ pơrjum, Củ tịc Quốk hội ồng Vương Đình Huệ đơs là, bơto bơtê mờ bơsram là broă lơh lài ngan tàm lơgar Việt Nam dê, tơnguh bơtàu broă bơto bơtê mờ bơsram geh ai là dùl tàm pe broă lơh pràn nàng lơh jăt broă lơh jŏ jòng tơnguh bơtàu lơh sa mpồl bơtiàn lơgar Việt Nam dê. Pơrjum cri bơyai bè broă bơto bơtê mờ bơsram, dùl bơta lơi hơ̆ gam kwơ màng rơlao mờ jơh ală broă gơrềng tus mờ kă bro, lơh sa, bơcri priă. Củ tịc Quốk hội kơ̆p kờñ, bàr gah pal sền gròi tus mờ ờ uă gah broă bè: Cíñ phủ lơgar Anh pơn jăt tai dong kờl ai broă bơto mờ bơsram dà đơs lơgar Anh tàm lơgar Việt Nam, pơn jăt tai tơnguh priă bơsram ai cau bơsram dờng lơgar Việt Nam in; tơnguh khà ală broă lơh, lơh bal broă bơto bơtê mờ ală hìu bơsram geh săp sèng lơgar Anh dê, tàm hơ̆ geh sền gròi tus mờ gah khoa họk, kông nghệ mờ bơto tiến sĩ.

Cau mblàng Ndong Brawl