Mho òr (06/08), tàm càr lơgar Jakarta, Củ tịc Quốk hội ồng Vương Đình Huệ mờ ală kwang đơng lam bồ Quốk hội, Nghị viện ală lơgar tàm Mpồl tam klăc Nghị viện ală lơgar tiah đah jum mat tơngai lik câu Á (AIPA) neh tus pơrjum Mpồl đơng AIPA. Tàm pơrjum, Củ tịc Quốk hội ồng Vương Đình Huệ bal mờ kwang đơng lam Nghị viện ală lơgar neh cri bơyai mờ ring bal broă lơh bơh Pơrjum dờng mpồl duh broă AIPA dơ̆ 44 dê; kwang bàng, broă pơrjum mpồl cau ùr nghị sĩ AIPA, Pơrjum nghị sĩ kơnòm să AIPA; tơngai mờ anih bơyai lơh Pơrjum Dờng mpồl duh broă AIPA-45.

Mờ tơngu me tờm “Nghị viện rơcang gơdờp tài dùl mpồl ASEAN kơl jăp mờ pas gơs”, Pơrjum dờng mpồl duh broă AIPA-44 geh broă pơgồp bal mờ di pal mờ tơngu me bal bơh mpồl ASEAN nam do dê là “Dùl ASEAN bơta dờng: tiah tờm bơh gơguh lơh sa dê”, tàm hơ̆ ai tơngŏ uă bơta gơdờp bơh ală Nghị viện mpồl ASEAN dê tàm bơta tiah do mờ dunia geh uă bơta tam gơl, mờ ai tơngŏ uă tus mờ broă cri bơyai mờ pơlam, tơnguh broă pơgồp bal đah gah lơh adăt boh lam mờ lơh jăt adăt boh lam, pơgồp bal tơnguh nùs nhơm tam klăc mờ gơnoar tờm bơh mpồl ASEAN dê.