Củ tịc Quôk hội ồng Vương Đình Huệ đơs nền, tàm broă lơh lơh broă mờ lơgar ndai bơh Việt Nam dê sùm tơnguh bơta git gơp mờ Nhờk; kơp kờñ 2 gah sơlơ tơnguh rlau tai tàm jơh ală gah Đảng, Cíñ phủ, Quôk hội, tìp mat lơh kwèng làng bol, lơh broă bal đah mpồl lơh sa kă bro mờ mpồl lơh sa kă bro, đah ală càr ,ƀòn dờng mờ càr, ƀòn dờng. Bàr nă kwang đơng lam bồ bal mờ gơp đơs là, 2 gah pal sơlơ tơnguh rlau tai tàm pơ gơl cribơyai broă mpồl kwang bàng kâp dờng, ală kâp, mpồl nghị sĩ lơh bơyô nàng bal mờ gơp tam pà mờng chài, tàm hơ̆ geh ală gah lơh adat boh lam, jat sền mờ lơh nền ală broă kuơmàng bơh dà lơgar dê.

Bàr gah ndrờm đơs sùm, Việt Nam mờ Nhờk ndrờm pơn đơl pràn lơh ngan mờ kờñ gùng dà, nùs nhơm tàm broă gàr sùm ring lơngai, kơ̆ kơljap, bơsong tam pìt tam phà tàm dà lềng đah mat tơngai lik mờ ală broă lơh ring lơngai, dipal mờ adat boh lam dunia, tàm hơ̆ geh Kông ươk Liên hợp quôk bè Adat dà lềng nam 1982.