VOV4.K’ho - Mho mờ mang òr (11/03), tàm hìu Quốk hội, Củ tịc Quốk hội ồng Vương Đình Huệ wă Củ tịc Tập đoàn Erax Honna Hitoshi. Củ tịc Quốk hội ồng Vương Đình Huệ đơs tờm, broă lơh git gơ̆p jŏ jòng jrô ơnàng tài bơta ring lơngai mờ pas gơs tàm câu Á đah lơgar Việt Nam mờ lơgar Nhờk tơngai pa do tơnguh bơtàu niam bơnĕ ngan, mùl màl ngan mờ geh cồng nha tàm ală gah broă.

Jăt Củ tịc Quốk hội ồng Vương Đình Huệ đơs, gùng dà tơnguh bơtàu rơndăp broă lơh ồs đèng sinh khối mờ tam gơl ală rơndăp broă lơh ồs đèng chah tŭ do lơh mờ hìu măi ồs đèng sinh khối bơh Tập đoàn Erax dê gơdờp ngan mờ broă lơh jŏ jòng dà lơgar dê bè gơguh bơta tơlir tơngai bơh nam 2021 tus 2030, wèt tus nam 2050 lơgar Việt Nam dê mờ Cíñ phủ pa ring bal. Củ tịc Quốk hội ồng Vương Đình Huệ đơs, Quốk hội, Cíñ phủ lơgar Việt Nam kờñ bal mờ gùng dà broă lơh do; mờ yal, tŭ do, broă lơh adăt boh lam lơgar Việt Nam dê neh geh tơlik ală kơrnoăt loh làng, mùl màl bè ală gah broă nàng ai tơl bơta ƀuơn ală mpồl lơh sa kă bro lơgar bơdìh in bơcri priă tàm lơgar Việt Nam. Pa do, Tập đoàn Erax neh sền tàm 16 càr, ƀòn dờng. Tàm tơngu me sền ù tiah, Tập đoàn di gơlan geh lơh 19 rơndăp broă mờ 1 rơbô 400 MW tus nam 2035; bal mờ hơ̆ pờ ơnàng broă lơh dờng rơlao tàm tơngu me tơnguh bơtàu sơntìl phan tam pa, hìu măi geh bơta pràn lơh geh ồs đèng dờng.

Cau mblàng Ndong Brawl