VOV4.K’ho- Tàm Hìu lơh broă Quôk hội, Củ tịc Quôk hội ồng Vương Đình Huệ pa geh dơ̆ wă Đại sứ lơgar Cuba tàm lơgar Việt Nam ồng Orlando Nicolas Hernandez Guillen mờ Đại sứ lơgar Nga tàm lơgar Việt Nam ồng Gennady Bezdetko tus lùp còp, dờp kơnòl broă.

Wă Đại sứ Cuba ồng Orlando Nicolas Hernandez Guillen, Củ tịc Quôk hội ồng Vương Đình Huệ mờ ồng Đại sứ ndrờm đơs nền, Việt Nam mờ Cuba kung sùm lòt bal, ơm rềp, tàm dong kờl bal mờ gơp tàm ală tŭ tơngai kal ke ngan rlau jơh, bal mờ gơp tam pà bơta chờ hờp bè ală cồng nha lơh geh tàm broă lơh bơt bơtàu mờ sền gàr dà lơgar.

Wă Đại sứ Nga ồng Gennady Bezdetko, Củ tịc Quôk hội ồng Vương Đình Huệ đơs ngan, Việt Nam sùm sền dờng màng git gơp lơh bơyô ờs mờng mờ lơh broă bal tơl làm mờ lơgar Nga, kơp kờñ sơlơ tơnguh rlau tai lơh broă bal mờ Nga tàm jơh ală gah, tài ring lơngai, kơ̆ kơljap, lơh broă bal mờ bơtàu tơnguh tàm tiah do mờ tàm dunia.

Cau mblàng K’Duẩn